ഓരോന്നായണയുന്നു താരക,ളുദി-
ക്കുന്നതില്ലൊന്നുമല്ലില്.
ഓരോന്നായ് പൊലിയുന്നു പൂക്കള്, കരളില്
പുത്തുലഞ്ഞില്ലയൊന്നും.
ഒരോന്നായ് പിരിയുന്നു നാള്ക്കിളി, പറ-
ന്നെത്തിടുന്നില്ല വീണ്ടും.
നേരം തോര്ന്നു, മടങ്ങ നമ്മ,ളിനിയും
കാത്തുനില്ക്കുന്നതാരെ?
2.4.05
ആലസ്യം
ദുരത്തെതോ മുരളികയിടറീ:
‘കണ്ണനെക്കണ്ടൊ നിങ്ങള്?’
ശംഖാക്രന്ദം: ‘തിരുമൊഴിയെവിടെ?’
-മൌനിയായ് യുദ്ധഭൂമി;
‘പോയ്, എപ്പോഴേ! മുടിയിവനരുളി-
ക്കല്പസായന്തനത്തില്;
പോകാതെന്താര്യര്?-നൃപതി കലി ഞാന്’
-ഉത്തമോരാത്രിയോതി.
16.1.04
മാതൃത്വം
പൊല്ത്താരങ്ങളെ നൊന്തുപെ,റ്റയി മുല-
പ്പാലൂട്ടി, താരാട്ടിയും
മെല്ലെപ്പിച്ച നടത്തിയും വഴിവിള-
ക്കായും കരുത്തായുമീ
വിശ്വത്തിന്നുയിരായ് വിളങ്ങുമമല-
സ്സത്താകുമീശത്വമേ
ശശ്വല് മാതൃവികാരമേ തൊഴുതിടാം;
നിന്നെക്കഴിച്ചാരു ഞാന്!
8.11.02
കാണി
ആട്ടം കണ്ടേ രസിപ്പാനിവിടിവനയി വ-
ന്നെത്തി; പക്ഷെ,ക്കലാശ-
ക്കൊട്ടും കേട്ടേ മടങ്ങാനിടവരുവതു ഹാ
കഷ്ടമല്ലോ;സദസ്സിന്
കൂട്ടും വിട്ടേ മയക്കപ്പിശകിനടിപെടാ-
നായി വട്ടത്തിലായി!
അജ്ഞാതം -കഷ്ട!-മുണ്ടോ കളി പുനരിഹ വാ-
ഴ്വിന്റെ കൂത്തമ്പലത്തില്?
5.6.02
എന്തു ഞാന് തെറ്റു ചെയ്തു
വെള്ളം!വെള്ളം! തളര്ന്നൂ; കനവുകള് കനമായ്ത്തീര്ന്നു
വയ്യാ നടപ്പാന്
ഉള്ളം കാളുന്നു നോവാല്; മുകളിലെരിമുകില്
മുള്ത്തലപ്പാവ് ; കാലില്
എന്നെത്താഴ്ത്തും ജഡച്ചങ്ങല; ചുമല്കളിലി-
ക്രൂശുമായ് കൂര്ത്ത വാഴ്വിന്
കുന്നേറാന് ഹാ! പിതാവേ! പറയുക,യതിനാ-
യെന്തു ഞാന് തെറ്റുചെയ്തു!
30.8.03
രാവ്
അന്തിത്താരകളില്ല ജീവിതനിശ-
യ്ക്കാശ്വാസമേകാന്, സുധാ-
സ്പന്ദം ചേര്ന്ന നിശാധിപന്റെ നിഴലും
കാണ്മീല, നീരാട്ടിനായ്
വൃന്ദാരണ്യലതാതുഷാരപുളകം
പൂണ്ടെത്തിയില്ലാ കുളിര്-
ക്കാറ്റും; ഹാ! കരിരാവിതിന് മദമൊലി-
ച്ചിറ്റുന്നുവോ പ്രജ്ഞയില്!
1.7.04
